Сучасная перапрацоўка адыходаў: мадэрнізаваную вытворчасць палімерных рэгранулятаў адкрылі ў Гродна

У Гродна на базе ААТ «Белдругпалімер» уведзена ў эксплуатацыю мадэрнізаваная вытворчасць палімерных рэгранулятаў. Ва ўрачыстым запуску прынялі ўдзел Старшыня Дзяржаўнага камітэта па маёмасці Дзмітрый Матусевіч, Старшыня Гродзенскага аблвыканкама Уладзімір Каранік, памочнік Прэзідэнта – інспектар па Гродзенскай вобласці Юрый Караеў і іншыя запрошаныя госці.

Асноўнай мэтай рэалізаванага інвестыцыйнага праекта па мадэрнізацыі існуючай вытворчасці з'яўлялася павелічэнне аб'ёмаў перапрацоўкі другасных палімерных адыходаў. Канчатковы прадукт вытворчасці – высакаякасная другасная гранула кампазіцыйнага поліэтылену. Яна з'яўляецца гатовым прадуктам і можа быць выкарыстана ў вытворчасці пясчана-палімерных вырабаў, дахавых матэрыялаў і інш. Прадукт таксама будзе выкарыстоўвацца прадпрыемствам пры стварэнні вырабаў з пластмас.

Як адзначыў Старшыня Дзяржаўнага камітэта па маёмасці Дзмітрый Матусевіч, холдынг «Белрэсурсы», які ўваходзіць у сістэму Дзяржкаммаёмасці, рэалізуе шэраг інвестыцыйных праектаў. «Гэта вытворчасць унікальная ў краіне. Тут будзе праводзіцца сартаванне плёнак. Напрыклад, бутэлька малака выраблена з аднаго віду пластмасы, абадок і накрыўка – з другога, а этыкетка – з трэцяга. Тут жа ўсё ў аўтаматычным рэжыме будзе сартавацца, пасля гэтага накіроўвацца на другасную перапрацоўку. Акрамя стварэння новых рабочых месцаў мы атрымаем і прамы імпартазамяшчальны эфект», – сказаў Дзмітрый Матусевіч. 

Глава ведамства таксама дадаў, што рэалізацыя праекта мае ўскосны эфект у сувязі з санкцыйнымі абмежаваннямі. «Работнікі былі абавязаны павышаць кваліфікацыю і ўласнымі сіламі рабіць фінальную наладку гэтага абсталявання, што сур'ёзна павысіла іх кампетэнцыі. Такім чынам атрымаўся сінергетычны эфект. Прадпрыемства накіравана на забеспячэнне цыркулярнай эканомікі ў складаных умовах. Адыходы, якія раней хаваліся на палігонах, зараз будуць уключаны ў эканамічны цыкл», – падкрэсліў Дзмітрый Матусевіч.

У ходзе адкрыцця Старшыня Гродзенскага аблвыканкама Уладзімір Каранік канстатаваў, што ў Гродзенскай вобласці і ў краіне ў цэлым развіваецца стратэгія поўнай перапрацоўкі і мінімізацыі захоўваемых адыходаў. «Новая лінія па вытворчасці палімерных рэгранулятаў дазваляе павялічыць глыбіню перапрацоўкі. Гэта ў першую чаргу клопат аб экалогіі. Бо мы разумеем: як нельга прадставіць сучаснае жыццё без пластыку, так і цяжка прадставіць, колькі год у зямлі ён будзе разлагацца. Наша задача – яго не пахаваць, а паўторна перапрацаваць. Гэта і эканамічна мэтазгодна, і экалагічна правільна», – сказаў Уладзімір Каранік.

Старшыня аблвыканкама дадаў, што работа з адыходамі дастаткова складаная, не вельмі гігіенічная і марудная. «Аўтаматычная лінія за кошт выкарыстання фотаэлементаў, розных сенсараў дазваляе адсартаваць віды пластыку, убраць тое, што не падлягае другаснай перапрацоўцы. Яна дазваляе пазбавіць людзей ад неабходнасці работы ў не вельмі добрых умовах, павысіць глыбіню перапрацоўкі пластыку і дазволіць другасна выкарыстоўваць тыя матэрыялы, якія на дадзеным этапе пакуль хаваюцца», – адзначыў ён.

Як расказаў дырэктар ААТ «Белдругпалімер» Аляксандр Чэкель, тэхналагічны працэс з'яўляецца самым сучасным у рамках перапрацоўкі адыходаў не толькі ў Беларусі, але і сярод краін СНД. «Адыходы сартуюць не людзі, а сартавальныя аўтаматы. Яны з дапамогай аптычных сканераў падзяляюць адыходы па відах, палімерах і забруджваннях. Тэхналогія прадугледжвае далейшае адмыванне і грануляцыю, дзе адбываецца палімерны расплаў праз мікронныя фільтры. Гэта дазваляе зрабіць матэрыял максімальна прыбліжаным да першасных відаў пластыку», – дадаў ён.

Запуск мадэрнізаванай вытворчасці палімерных рэгранулятаў практычна на 70% павялічыць перапрацоўчыя магутнасці палімераў да 5 тыс. у год. Як было адзначана, 50% атрымліваемых рэгранулятаў будуць экспартавацца за мяжу. З уводам у эксплуатацыю новай лініі на прадпрыемстве ААТ «Белдругпалімер» было створана 12 рабочых месцаў. Арыенціровачная акупнасць праекта – каля 8 гадоў. Аднак зыходзячы з якасці атрымліваемага прадукту, на прадпрыемстве разлічваюць зменшыць тэрмін да 5 гадоў.