Прадстаўнікі «Беларуськалія» – лаўрэаты дзяржаўных прэмій Беларусі

Прэзідэнт Беларусі Аляксандр Лукашэнка ўручыў дзяржаўныя прэміі, дыпломы акадэміка і члена-карэспандэнта вучоным Нацыянальнай акадэміі навук.  

Перад пачаткам мерапрыемства Кіраўнік дзяржавы агледзеў выставу ў Дварцы Незалежнасці, прысвечаную навуковым дасягненням у розных галінах ведаў, у тым ліку лаўрэатаў дзяржаўных прэмій Беларусі. 

Увазе Прэзідэнта былі прадстаўлены інавацыйныя распрацоўкі ў сферах водаачысткі, вытворчасці праходчых машын. Побач – абсталяванне, якое прымяняецца пры трансплантацыі органаў, напрацоўкі для лячэння анказахворванняў. А яшчэ – дэталі для ракетных комплексаў, узоры вакуумна-плазменных пакрыццяў, лазеры рознага прызначэння, напрацоўкі па крыпталогіі, тэхналогіі распрацоўкі месцанараджэнняў калійных солей. 

На нарадзе-пасяджэнні Кіраўнік дзяржавы падкрэсліў, што кожны вучоны, дзейнасць якога адзначана Дзяржаўнай прэміяй, які змог дасягнуць такой вышыні, – без усялякіх сумненняў нацыянальны здабытак. «Іх няшмат. Напэўна, шмат і быць не можа. Але чым больш, тым лепш», – адзначыў Прэзідэнт.

Аляксандр Лукашэнка павіншаваў вучоных з чарговым значным этапам у жыцці і новым статусам, які, па-яго словах, адкрывае новыя гарызонты і дае дадатковыя магчымасці зрабіць яшчэ больш карыснага для краіны. 

«Галоўнае, каб вашы распрацоўкі не аказаліся «пыльнымі». Каб яны, не дай бог, не засталіся без увагі. Але гэта малаверагодна, паколькі само званне лаўрэата Дзяржаўнай прэміі – гэта ўжо дасягненне. Гэта не толькі адкрыццё, гэта і асваенне ў вытворчасці», – звярнуў увагу беларускі лідэр.

У галіне навукі і тэхнікі за работу «Інавацыйныя тэхналогіі распрацоўкі месцанараджэнняў калійных солей, развіццё высокатэхналагічных і навукаёмістых вытворчасцей і стварэнне сучаснай імпартазамяшчальнай высокапрадукцыйнай тэхнікі для іх здабычы і перапрацоўкі» прэмія ўручана генеральнаму дырэктару «Беларуськалія» Івану Галаватаму, намесніку галоўнага інжынера па горных работах – начальніку ўпраўлення горных работ Андрэю Пятроўскаму, намесніку галоўнага інжынера па перспектыўным развіцці – начальніку аддзела перспектыўнага развіцця Дзмітрыю Барбыкаву, намесніку дырэктара па вытворчасці Салігорскага інстытута праблем рэсурсазберажэння з вопытнай вытворчасцю Аляксандру Канапляніку, начальніку аддзела галоўнага канструктара – намесніку галоўнага канструктара Дзмітрыю Доўнару і начальніку аддзела выемачных машын і комплексаў Вячаславу Міхалене.

У выніку выкананых аўтарамі даследаванняў і распрацовак створаны і ўкаранёны новыя тэхналогіі вядзення горных работ па здабычы калійных солей, інтэлектуальныя сістэмы кіравання тэхналагічнымі працэсамі, асвоена вытворчасць сучаснай высокапрадукцыйнай імпартазамяшчальнай тэхнікі для горнай і хімічнай прамысловасці. Выкарыстанне новых тэхналогій выемкі калійных пластоў дазваляе атрымліваць з нетраў больш за 80% запасаў калійных солей (рост на 20%). Сёння такога паказчыка не дасягнуў ні адзін калійны руднік у свеце (у Расіі, Германіі і Канадзе паказчык вытрымкі не перавышае 40%). У Беларусі ўпершыню прыменена тэхналогія ўскрыцця запасаў калійных солей з выхадам на прадуктыўны пласт менш чым за два гады (прымяненне стандартнай схемы займае да шасці гадоў), у выніку капітальныя выдаткі зніжаны ў дзевяць раз.

Укараненне распрацаваных інтэлектуальных сістэм вентыляцыі руднікоў дазволіла зменшыць энергаспажыванне на 30%. Выкананы поўны цыкл стварэння сучаснай імпартазамяшчальнай тэхнікі для калійнай прамысловасці – ад навуковых даследаванняў да вопытна-канструктарскіх распрацовак і серыйнай вытворчасці. Агульны эканамічны эфект ад работы склаў Br993 млн, створана болей 700 рабочых месцаў для высокакваліфікаваных спецыялістаў.

Па матэрыялах president.gov.by 

Фота: president.gov.by, тэлеграм-канал «Пул Першага»